SÖHBƏT QURANİ-KƏRİM OXUMAĞIN ƏDƏBİ (1)

Sual: Quran oxuyarkən nələrə diqqət etmək lazımdır?

CAVAB: Quranı-kərim oxuyarkən aşağıdakı ədəblərə diqqət edilməlidir:

1-Dəstəmazlı olaraq təmiz bir yerdə qibləyə qarşı diz üstə oturulmalıdır! Kişilər başı açıq oxumamalı, heç olmasa bir təkkə geyinməlidirlər! Təkkəsiz oxumaq tənzihən məkruhdur.

[Mushafa baxaraq oxumaq, əzbər oxumaqdan daha savabdır.]

2-Quranı-kərim oxumağa  başlayarkən Əuzü və Bəsmələ çəkilməlidir!

3-Mənasını bilən də, bilməyən də ağır-ağır oxumalıdır!

4-Mümkün olarsa ağlayaraq oxumalıdır! Ağlaya bilməyən kimsə ağlamaq üçün özünü məcbur etməlidir!

5-Hər ayətin haqqını verməli, yəni əzab ayətini oxuyarkən qorxaraq, rəhmət ayətlərini həvəslənərək, tənzeh ayətlərini təsbih edərək oxumalıdır!

6-Quranı-kərim oxuyarkən özündə riya, yəni göstəriş oyanarsa və ya namaz qılan kimsəyə mane olarsa yavaş səslə oxumalıdır!

7-Quranı-kərimi təcvidə uyğun və gözəl səslə oxumalı, təğanni oxunmamalıdır!

[Təğanni hərfləri, kəlmələri pozaraq zəngulə deməkdir. Zəngulə edərkən hərflər pozularsa haram, hərflər pozulmazsa məkruh olar. “Haləbi”də deyilir ki: “Quranı-kərimi zəngulə ilə oxuyan imamın arxasında qılınan namazın iadə edilməsi lazımdır.]

(davamı sabah)