MƏNQİBƏ YA RƏBB! İMANLA ÖLMƏYİMİ NƏSİB ET!

    Övliyanın böyüklərindən bir şəxs həcc zamanında insan cildinə girmiş olan İblisi Ərafatda gördü. Zəifləmiş və siması solmuş, gözü yaşlı və donqarı çıxmış, pərişan bir halda idi. Övliya olan şəxs İblisi tanıyıb ona dedi ki:

-     Nə üçün belə yaşlı görünürsən?

-  Ticarət məqsədi olmadan, sırf Allah rizası üçün həcc etməyə gələnlərin, bu arzuları üzündən digərlərinin də haclarının Allah tərəfindən qəbul edilməsindən qorxdum. Onun üçün ağlayıram.

-     Səni zəiflədən nədir?

- Hacıları gətirən atların inləməyə, kişnəyərək gəlmələrinə kədərləndim. Halbuki mənim yoluma gedənləri belə aparsalardı sevincim çox artardı.

-    Yaxşı, simanı solduran nədir?

- Müsəlmanların ibadətlərinə davam etmələri və bir-birləriylə yardımlaşmalarıdır. Əgər üsyanda yardımlaşsalardı, sevincim artardı.

-   Səni çökdürüb, belini bükən nədir?

- Qulların, “Ya Rəbbi, iman ilə ölməyimi nəsib eylə” deyə dua etmələridir. Halbuki mən onları öz ibadətlərini bəğəndirib və ya Allah bağışlayar deyə onları azdırıb və ya sonra edərsən deyə aldadıb imansız getmələri üçün çalışıram. Allaha belə yalvaranların mənim hiylələrimi anlayıb tədbir almalarından qorxuram.