Untitled Document

RƏVAYƏT - NAMAZINI HEÇ TƏRK ETMƏDİ

Bir sərxoş ölür. Xanımı cənazəni yuyub dəfn edən bir nəfər tapmadığından, iki hambal tutub cənazəni qəbiristana gətirir. Orada bir zahid həmin cənazənin namazını qılmağa hazırlaşarkən, onu görənlər də gəlib cənazənin namazını qılırlar. Lakin bir zahidin bir sərxoşun namazını qılmasına təəccüb edirlər. Zahid də, bu gecə yuxuda mənə qəbiristana gəlməyi, orda sahibsiz bir cənazənin namazını qılmağı dedilər. O cənazə bağışlananlardan biridir, dedilər.

Sərxoşun xanımından ərinin yaxşı xüsusiyyətlərinin olub olmadığını soruşdular. O da belə dedi: Ərim fasiq idi, içki içərdi. Lakin namazını heç tərk etməzdi. Sübh namazını həmişə camaatla qılardı. Kimsəsizlərə mərhəmət edər, onların ehtiyaclarını təmin edərdi. İçki içib ayıldığı zaman “Ey Rəbbim. Mənim kimi fasiqi Cəhənnəmin harasına atacaqsan” deyərək ağlayar, içkini ata bilmədiyi üçün kədərlənirdi”. Zahid bunları dinlədikdən sonra, “Demək ki, bağışlanmasına səbəb bu gözəl əxlaqı səbəb oldu” dedi.

YEMƏK - YERKÖKÜ SALATI

2-4 porsiya üçün nəzərdə tutulub

Ərzaqlar

4 ədəd yerkökü, 2 xörək qaşığı zeytun yağı, 1 stəkan qatıq (çox turş olmasın), 3 diş sarımsaq, zövqə görə sarı kişmiş, zövqə görə xırda doğranmış qoz, zövqə görə duz, zövqə görə istiot.

Hazırlanması:

1. Yerkökülərin qabığını soyun və sürtgəcin iri dişindən keçirin.
2. Tavada zeytun yağını qızdırın. Yerkökünü yağa əlavə edib, tez-tez qarışdıraraq yerkökülər yumşalanadək (təxminən 6-7 dəqiqə) bişirin. Bişmiş yerkökülər yumşaq olsalar da, bir qədər diri qalmalıdırlar. Kənara çəkib, yerköküləri soyudun.
3. Sarımsağı əzin. Bir qabda qatıqla sarımsağı qarışdırın. Soyumuş yerkökünü, kişmiş və qozu bu qarışıma əlavə edin. Zövqə görə duz, istiot vurun və yaxşıca qarışdırın. Salatın daha da sulu olmasını istəyirsinizsə, ona daha çox qatıq əlavə edin.
4. Salatı bir az soyuducuda saxlayın. Süfrəyə verməzdən əvvəl, bir qaba qoyub, üzərini qara zeytunla bəzəyin.