Untitled Document

FAYDALI MƏSLƏHƏT

Zəfəran Dəmini Necə Hazırlamalı:

Azərbaycan mətbəxində zəfərandan yeməklərə gözəl ətir və rəng qatmaq üçün geniş istifadə olunur. Zəfəran aldığınızda çalışın onu toz halında deyil tellərini alın. Zəfəran telləri uzun müddət saxlandıqdan sonra belə öz təravəti və ətrini itirmir. Zəfəran dəmi adətən plovlarda, bəzi ət xörəklərində, şorbalar və şirniyyatlarda istifadə olunur. Zəfəran dəmini aşağıda izah olunduğu kimi hazırlaya bilərsiniz. Nəzərə alın ki, zəfəranın və suyun miqdarı reseptdən reseptə dəyişə bilər, odur ki, reseptinizdə qeyd edilən miqdarı əsas tutaraq bu ümumi qaydadan istifadə edin.

1. Zəfəran tellərini həvəngdəstə vasitəsiylə döyün və toz halına gətirin.
2. Zəfəran tozunu kiçik kasa və ya stəkana qoyub, üzərinə qaynar su əlavə edin. Kasanı nəlbəki ilə örtün. Qoyun kənarda ən azı 10 dəqiqə ərzində dəmlənsin. Sonra isə hazırladığınız dəmi reseptdə tələb olunduğu kimi istifadə edin.

YEMƏK - FİRNİ

Ərzaqlar:
Düyü - 40 q.
Süd - 200 q.
Şəkər tozu - 10 q.
Kərə yağı - 10 q.
Darçın - 0,2 q.
Duz

Hazırlanması:
Düyü 2-3 saat suda isladılır. Sonra sudan çıxarılıb qurudulur, həvəng dəstədə döyülür. Qaynayan südə qarışdıra - qarışdıra düyü unu əlavə edilir, şəkər və duz qatılıb bişirilir. Süfrəyə verdikdə üstünə yağ tökülüb, şəbəkə şəklində darçın səpilir.