SÖHBƏT - GÖZ MUNCUĞU TAXMAQ GÜNAHDIR?
Göz muncuğu taxan hər kəsə müşrik (Allaha şərik qoşan) demək çox yanlışdır. Muncuğun yaradıcı bir qüvvəyə sahib olduğuna inanmaq şirkdir. Lakin hansı müsəlman bir muncuğun yaradıcı gücü olduğuna inanar?
Nəzər dəyməməsi üçün tarlaya sümük, qorxuluq, heyvan kəlləsi qoymaq caizdir (icazə vardır). Bir qadın tarladakı məhsuluna nəzər dəyməməsi üçün nə etmək lazımdır, deyə soruşanda, Rəsulullah əfəndimiz “Tarlaya heyvan kəlləsi qoy” buyurmuşdu. Baxan əvvəl bunu görər, sonra tarladakı məhsulu görər. (Rədd-ül Muxtar)
Göz muncuğunun özü və ya heyvan kəlləsi nəzərin qarşısını ala bilməz. Nəzərin qarşısını alan Allahü təaladır. Baxan, əvvəl bunları görəndə, gözlərindən çıxan zərərli şüalar bunlara isabət edər. Nəzərin gerçək olduğu ayəti–kərimələrlə sabitdir. Hədisi-şəriflərdə də “Nəzər haqdır” buyuruldu. (Müslim)
RƏVAYƏT - NAMAZA QALX!
Övliyanın böyüklərindən Bayəzidi-Bistami (quddisə sirruh) bir gecə yuxuya dalıb, sübh namazına oyana bilmədi. O qədər ağlayıb inlədi ki, bir səs eşitdi: “Ey Bayəzid! Bu qüsurunu əfv etdim. Bu ağlamanın bərəkəti ilə sənə ayrıca yetmiş min namaz savabı verdim”. Bir neçə ay sonra yenə yuxuya daldı. Şeytan gəlib mübarək ayağından tutaraq oyandırdı. “Qalx, namazın keçir”, dedi. Bayəzidi Bistami həzrətləri buyurdu ki: “Ey lənətlənmiş, sən belə iş necə edərsən? Sən hər kəsin namazının keçməsini, vaxtını keçirməsini istəyirsən. Məni nə üçün oyatdın?” Şeytan dedi ki: “Sübh namazını keçirdiyin gün ağlayaraq yetmiş min namaz savabı qazanmışdın. Bu gün onu düşünərək səni oyandırdım ki, bir vaxt namaz savabı alasan. Yetmiş min namaz savabına qovuşa bilməyəsən!”