Bir Ramazan günü idi. Müsəlman məhəlləsində yaşayan bir Məcusinin (atəşpərəst) kiçik oğlu, oruclu müsəlmanların yanında çörək yeyirdi. Atası uşağın bu hərəkətini görəndə “Oğlum Müsəlmanların yanında yemək yeyilərmi? Onlar bu günlərdə oruc tutarlar, bu günlər onların mübarək günləridir, hörmət etmək lazımdır” deyərək danladı və “get evdə ye!” deyərək uşağı evə göndərdi.

Bu hadisədən bir neçə il sonra bu Məcuzi öldü. Ölümündən sonra şəhərdəki bir müsəlman yuxusunda bunu Cənnəti-alada gördü. Məcuziyə “Necə oldu ki, bu nemətə qovuşdun? Biz səni Məcuzi bilirdik. Hətta öldüyün zaman cənazə namazını belə qılmamışdıq” dedi.

O da bu cavabı verdi: Bəli! Doğru deyirsən. Mən bir məcusi idim. Lakin bir gün kiçik oğlum müsəlman məhəlləsində, onlar oruclu olduğu halda yemək yeyirdi. Mən uşağımın onların gözləri qarşısında çörək yeməsinə icazə vermədim. Müsəlmanların hörmət etdiyi bir şeyə mən də hörmət etdiyim üçün, Cənabı-Allah, xəstə yatağımda məni Müsəlman olmaqla şərəfləndirdi. Müsəlman olaraq öldüyüm üçün bu nemətə qovuşdum”

Ehtiyacı olan əşyadan, borclardan artıq olaraq zəkat nisabı qədər malı və pulu olan hər müsəlmanın Ramazan ayında bayram namazına qədər fitrə verməsi vacibdir. Səfərdə olanın da fitrə verməsi lazımdır.

Ehtiyac əşyası demək qiyməti nə qədər çox olursa olsun bir ev, bir aylıq yemək, hər il üç qat paltar, evdə istifadə olunan əşya və alətlər, minik vasitələri, peşə kitabları və ödəyəcəyi borclardır. Ticarət üçün olmayan ehtiyacından artıq olan əşya, kirayədəki evlər, evindəki bəzək əşyası, sənət və ticarət alətləri, yerə sərili olmayan xalçalar, istifadə edilməyən artıq ev əşyası qurban və fitrə üçün nisab hesabına qatılır.

Fitrə olaraq 1750 qram buğda və buğda unu, 3,5 kilo arpa, xurma və ya quru üzüm verilir. Bunların qiyməti qədər qızıl və gümüş də verilə bilər.