DÜNYA ÖLKƏLƏRİN TOY ADƏT VƏ ƏNƏNƏLƏRİ

Holland toylarında gəlinlə bəyin masasının yanında ağac yerləşdirirlər. Toya gələn qonaqlar gəlin və bəy üçün arzularını yazaraq, bu ağaca asırlar.
Polşada gəlinlər toyda yalnız pul qarşılığında rəqs edirlər.

İsveç toylarında qonaqlar gəlin və bəyi öpürlər. Əgər gəlin rəqs etməyə gedirsə, bütün qadın qonaqlar bəyi öpmək üçün sıraya düzülürlər. Əgər bəy ortalıqda görünməsə, kişilər gəlini öpmək üçün növbəyə dururlar.

Şimali Koreyada qadınların yaşı 25-dən, kişilərin isə 27-dən aşağıdırsa, evlənmələri qadağandır. Evlənmədən əvvəl fərdlərin əsgərlik və dövlətə qarşı digər öhdəliklərini yerinə yetirmiş olması vacibdir.

Bolqarıstanda toyda gəlin içində köhnə pul, çiy yumurta və buğdanın olduğu qabı başının üzərindən geriyə doğru atır və arxasına baxmır. Qab nə qədər kiçik parçalara ayrılsa, o qədər yaxşıdır. İnanca görə, hələ evlənməmiş iki gəlin namizədinin başqa birisinin toyunda qarşılaşması uğursuzluq kimi qəbul edilir, çünki bu halda onların bir-birlərinin xoşbəxtliyini oğurlayacaqlarını düşünürlər.

Pakistanın bəzi bölgələrində bəy namizədi qızın ailə böyükləri tərəfindən imtahana çəkilir. Bu imtahanda ailə böyükləri bəy namizədinə ağla gələ biləcək bütün təhqir və söyüşləri işlətməlidirlər, bəy namizədi isə bütün bunlara dözə biləcək qədər soyuqqanlı olmalıdır. İmtahandan müvəffəqiyyətlə keçən gənc evlilik icazəsini almış olur.

Mavritaniyada evlənmə çağına gələn qızların ən az 60, ən çox da 100 kilo olması vacibdir. Hətta gəlin yemək yeməkdən imtina etsə, cəzalandırılır.
Finlandiyalı gəlinlər toyda əl işi olan qızıl tac taxırlar. Mərasimdən sonra subay gənc qızlar gəlinin ətrafında toplanır. Gəlin gənc qızlar arasından birini seçərək qızıl tacını ona verir, bu da seçilən qızın ondan sonra evlənəcəyinə işarədir.

Şotlandiyada qədim inanca görə, gəlin toydan bir gün əvvəl küçəyə çıxarılmalı və onun üstünə yumurta, sous kimi maddələrin qarışığı bulaşdırılmalıdır. Və o bu görkəmdə şəhər boyu gəzdirilməlidir. Gecə isə o, ailə böyüklərinin ayaqlarını yumalıdır. Bu ənənə cütün xoşbəxtlik yolunda getmələrinin simvoludur.

Alman gəlinləri toyda duvaq əvəzinə, çiçəklərlə bəzədilmiş tac taxırlar. Toy mərasiminin sonunda cütlük bir kötüyü mişarla kəsir, bu da qarşılaşdıqları çətinliklərə birlikdə sinə gərəcəkləri mənasını verir. Qonaqlar cütün üstünə düyü səpirlər, bu da bərəkət mənasını verir. Gəlinin saçında nə qədər düyü dənəsi qalsa, bu o deməkdir ki, onların düyü dənələrinin sayı qədər uşaqları olacaq.