ƏSHABİ KİRAM - Ömər-Ül Faruq

Ədalətin timsali ikinci böyük xəlifə. Həzrəti Həmzənin Müsəlman olması üzərinə Məkkəli müşriklərin təlaş və narahatlıqları hədd mərhələyə çatmışdı. Çünki barmaqla göstərilən qəhrəmanlardan biri də Müsəlman olmuş, Rəsulullahın yanında yer almışdı. Bu gözlənilməyən hadisə müşrikləri tamamilə hövsələdən çıxardı. Həzrəti Ömər bu arada hələ Müsəlman olmamışdı. Bir gün Rəsulullah əfəndimizi gördüyü yerdə öldürmək niyyəti ilə evindən çıxdı. Sevgili Peyğəmbərimizi Məscidi-Haramidə namaz qılarkən tapdı və namazın bitməsini gözləyərək dinləməyə başladı. Həbibi-əkrəm əfəndimiz Əl-Haqqa surə-şərifini oxuyurdu. Qəlbim meyl etdi... Xattaboğlu Ömər Peyğəmbər əfəndimizin oxuduqlarını heyranlıqla dinləyirdi. Ömründə belə gözəl sözlər eşitməmişdi. Bunu özü sonradan belə danışır: “Dinlədiyim bu sözlərin bəlağətinə, düzülüşünə, yerində olmasına heyran olmuş və nə üçün gəldiyimi unutmuşdum. Bu hadisədən sonra qəlbimdə İslama qarşı bir istək hasil oldu.” Bu hadisənin Həzrəti Ömərin Müsəlman olmasında mühüm təsiri olmuşdur. Çünki qəlbini yumşaltmış, Müsəlman olmasına zəmin hazırlamışdır. Həzrəti Həmzənin Müsəlman olmasından üç gün sonra, Əbu Cəhil, müşrikləri yığıb dedi ki: Ey Qureyş! Muhamməd, bütlərimizə dil uzatdı. Bizdən əvvəl gələn atalarımızın Cəhənnəmdə əzab gördüklərini, bizim də oraya gedəcəyimizi söylədi! Onu öldürməkdən başqa çarə yoxdur! Onu öldürəcək adama yüz dəvə və saysız qızıl verəcəyəm! Bir anda Xattaboğlu Ömərin qəlbindən İslama olan istək itdi və yerindən qalxaraq dedi ki: Bu işi Xattaboğlundan başqa edəcək yoxdur. Haydi Xattaboğlu! Görək səni! Bu işi səndən başqa edə biləcək kimsə yoxdur. Xattaboğlu Ömər, qılıncını alıb yola düşdü. Gedərkən Nuaym ibn Abdullaha rast gəldi. Yolda Nuaym ibn Abdullah ondan soruşdu: Ya Ömər, belə şiddət və hiddətlə hara gedirsən?

- Millətin arasına nifaq soxan, qardaşı qardaşdan ayrı salan bir nəfəri öldürməyə gedirəm. Ya Ömər, çətin bir işə gedirsən. Onun Əshabı ətrafında pərvanə kimi dönməkdədir. Ona bir şey olmasın deyə titrəməkdədirlər. Onun yanına yaxınlaşıb zərər verə bilməzsən! Yaxınlarınla məşğul ol... Bu sözə çox hiddətlənən Həzrəti Ömər qılıncına sarıldı: - Yoxsa sən də mi onlardansan? Əvvəl sənin işini bitirim. Nuaym ibn Abdullah cavab verdi: - Sən mənimlə məşğul olacağına, bacın Fatimə ilə qaynın Səidin yanına get! Onlar, çoxdan Müsəlman oldular. Sən əvvəl öz yaxınlarınla məşğul ol! - Xeyr, onlar Müsəlman ola bilməzlər. - Mənə inanmırsansa, get evlərinə, özlərindən soruş! Bunun üzərinə Həzrəti Ömər, bacısını maraq edib hirslə dərhal evlərinə getdi. O sırada Taha surəsi yeni nazil olmuş, qaynı Səid ilə bacısı Fatimə bunu yazdırıb Həzrəti Habbab ibn Ərət adındakı səhabəni evlərinə gətirmiş, oxuyurdular. Xattaboğlu Ömər, qapıdan bunların səsini eşitdi. Qapını çox sərt döydü.

(davamı sabah)