SÖHBƏT - 3-CÜ CİLD 9-CU MƏKTUB

İmam Rabbani Mücəddidi əlfi sani Əhməd Farukinin (rahimə-hullahü təala) “Məktubat”ından üçüncü cildinin doqquzuncu məktubu, Mir Muhamməd Numan üçün yazılmışdır. “Rəsulullahın gətirdiklərini alın!” ayəti kəriməsini izah etməkdədir. Bu məktub ərəb dilində olub, tərcüməsi aşağıdakı kimidir:

Bismilləhirrahmənirrahim! Haşr surəsində, yeddinci ayəti kəriməsində buyurulub: “Rəsulullahın sizə gətirdiklərini alın. Qadağan etdiklərindən çəkinin və Allahdan qorxun!” Əmrləri yerinə yetirməyə və haramlardan çəkinməyə “İslamiyyət”ə uymaq deyilir. Allahü təalanın, qadağalardan çəkinin, dedikdən sonra Allahü təaladan qorxun buyurması, qadağanlardan qorunmağın daha mühüm olduğunu göstərməkdədir. Çünki Allahü təaladan qorxmaq, yəni “Təqva”, haramlardan qorunmaqdır. Təqva dinin təməlidir. Şübhəli şeylərdən də çəkinməyə “Vera” deyilir. Rəsulullah (sallallahü aleyhi və səlləm), “Dininizin dirəyi vəradır”, buyurdu. Başqa bir Hədisi-şərifdə, “Heç bir şey vəra kimi ola bilməz”, buyurdu. Dinimizin haramlardan çəkinməyə belə əhəmiyyət verməsi, çəkiniləcək şeylərin daha çox olmasından və faydasının daha çox olmasından irəli gəlir. Çünki əmrləri yerinə yetirmə­nin özündə də çəkinmələr mövcuddur. Bir əmri yerinə yetirmək, bu əmri yerinə yetirməməkdən çəkinmək deməkdir. Faydasının daha çox olması, nəfsə heç tabe olmamasındadır. Əmri yerinə yetirərkən, nəfs də ləzzət alır. Bir işdə, nəfsə uymaq nə qədər az olarsa, faydası da o qədər çox olar. Yəni Allahü təalanın rizasına daha tez qovuşdurar. Çünki əhkamı-islamiyyə, yəni islamiyyətin əmr və qadağaları, nəfsi cəzalandırmaq, zəiflətmək üçündür. Nəfs, Allahü təalanın düşmənidir. Hədisi qüdsidə, “Nəfsinə düşmənlik et! Çünki o, mənim düşmənimdir”, buyruldu. Bunun üçün yüksək təriqət yolları içində, islamiyyətə daha çox əməl olunan yol, Alahü təalaya daha yaxın yoldur. Çünki burada nəfsə uymamaq daha çoxdur. Bu da, bizim olduğumuz yoldur. Buna görə də, böyüyümüz, öndərimiz, böyük alim Bəhaüddini Buxari, “Allahü təalaya qovuşduran yolların ən qısasını tapdım”, buyurmuşdur. Çünki bu yolda nəfsə qarşı gəlmək daha çoxdur. Bu yolda, islamiyyətə riayət etməyin çoxluğuna gəldikdə, kitablarını araşdıran ağıllı və insaflı bir insan üçün bunu anlamaq çox asandır. Belə olduğunu aydın görür. Belə aydın olmaqla yanaşı, bir çox məktubumda bunu ətraflı bildirdim. Hər şeyin doğrusunu Allahü təala bilir. O, bizə yardımçıdır. Çox gözəl bir vəkildir. Əfəndimiz Muhamməd əleyhissəlama və Alinə və Əshabına (radıyallahü təala anhüm əcmain) və doğru yolda olanlara salət və salam olsun!