Namazlarda niyyət

Namaza başlayarkən, niyyətin necə olmasının lazım olduğu haqqında kitablardakı məlumatlar qısaca belədir:

Niyyətin yeri qəlbdir. Dil ilə də deyilməsi yaxşıdır. Dil ilə deyilməzsə, bir şey lazım deyil. «Əl-Kafi, Fətavayi-Hindiyyə»

Peyğəmbər əfəndimizin namaza başlayarkən, dillə niyyət etdiyi bildirilməmişdir. Səhabə və tabiindən də belə bir şey bildirilməmişdir.“Hilyə”də dörd məzhəb imamından dillə niyyətin ediləcəyi haqqında bir şey bildirilməmişdir. Niyyəti dillə etməyin bidət olduğunu bildirən alimlər vardır. “Fəth”in müəllifi bunu nəql etmişdir. “Hilyə”də «bəlkə ən uyğunu qəlbi əmin etmək üçün, dillə söyləmək bidəti-həsənə olar» deyilmişdir. «Rəddül-muxtar»

Hənəfidə namaza dillə niyyət bidətdir, ancaq vəsvəsədən xilas olmaq üçün, caiz görülmüşdür. «Məzahibi-ərbəa»

İmami-əzəm həzrətlərinin fətvalarını bildirən “Əl-ihtiyar” kitabında «niyyət o namazın hansı namaz olduğunu qəlbən bilməkdir. Bu işdə dil ilə söyləməyə etibar edilməz» buyurulur.

“Dürər və qurər”də «“Hidayə”də bildirildiyinə görə, niyyət qəlblə hansı namazı qıldığını bilməkdir. Dillə söyləməyə etibar edilməz. Qəlbin hazır olması üçün, dillə də deyilməsi müstəhəbdir, yaxşı olar» buyurulur.
“Hələbi”də «niyyət qəlblədir, dillə də deyilməsi müstəhəbdir. Qəlbən niyyət edib dillə deyilməsə, zərəri olmaz» buyurulur.

İslam alimlərinin göz bəbəyi olan imam Rəbbani həzrətləri Kabil müftisinə yazdığı bir məktubunda buyurur:
Alimlər namaza başlayarkən, qəlbdə niyyət etməklə bərabər, ağızla da söyləməyin müstəhəb olduğunu demişdir. Halbuki Rəsulullah əfəndimizin, əshabi-kiramın və tabiinin sözlə niyyət etdiyi zəif bir xəbərlə də bildirilməmişdir. Ağızla niyyət etmək bidətdir. Buna bidəti-həsənə deyirlər. Halbuki bu bidət tək sünnəni yox etməklə qalmayıb, fərzi də yox edir. Çünki çox adam təkcə ağızla niyyət edib, qəlbində niyyət etmir. Rəsulullahın sünnəsinə bir şey qatmaq olmaz və onun əshabi-kiramına tabe olmaq lazımdır. «1/186»