Hər şey günahdır?

Dinimizdə hər şey günah deyil. Halal olan şeylərə görə haramlar çox azdır. Bütün meyvələr, bütün səbzilər və zəhərli olanları xaric, bütün otlar mübahdır. Dəniz həşəratı xaric, bütün balıq növləri; sərxoş edənlərdən başqa bütün içiləcək şeylər halaldır. Məhrəm olan qohum və dinsiz olanlardan başqa yad qadınların hamısıyla evlənmək mübahdır. İpəkdən başqa bütün paltarlar mübahdır. İmam Rəbbani həzrətləri buyurur: Allahu-təalanın mübah etdiyi və icazə verdiyi şeylərin növü və sayı daha çoxdur. Haram etdiyi və qadağa qoyduğu şeylər isə çox azdır. Mübahlardakı fayda və ləzzət haramlardan daha çoxdur. Allahu-təala mübah iş görəni sevər, haramla məşğul olanı isə sevməz. Ağıllı olan insan tez keçib gedən bir ləzzətə görə Allahu-təalanı incitməyi, əlbəttə, istəməz. Allahü-təala qullarına mərhəmət və hörmət edərək mübahlardan zövq almağa izn vermiş və bir çox şeyi mübah etmişdir. Halal olan bu saysız zövq və ləzzətləri buraxıb haram edilən bir neçə zövqə meyl etmək Allaha qarşı ədəbsizlik olar. Bununla belə, haram etdiyi ləzzətləri artıqlamasıyla mübahlarda da yaratmışdır. Halal olan müxtəlif nemətlərin zövqü bir yana, Rəbbinin insanın işindən razı olmasından daha böyük zövq ola bilərmi? Bir kölənin işini ağasının bəyənməməyindən daha böyük dərd varmı? Biz quluq və sahibimiz olan Allahın əmrindəyik. Başıboş deyilik.

ANA, ANA ALLAH BİZİ GÖRÜR.

Həzrət Ömər xəlifəliyi dövründə bir gecə asayişi yoxlamaq üçün Mədinə küçələrində gəzirdi. Gecənin qaranlığında önündən keçməkdə olduğu bir evdən yüksək səslər eşitdi. Bir ana qızına belə deyirdi:

- Qızım, sabah satacağımız südə su qarışdır!
- Ana, Xəlifə südə su qarışdırmağı qadağan etdi axı.
- Qızım, gecənin bu vaxtında Xəlifənin haradan xəbəri olacaq, o indi yatağında yatır.
- Ana! Ana! Xəlifə yatır, xəbəri olmaz deyirsən. Hər şeyi bilən, görən və hər şeyə qadir olan Allahü təala bizi görür, halımızı bilir! Hiyləmizi insanlardan gizləyə bilərik, lakin hər şeyi bilən və görən Allahdan necə gizlədək?

Həzrət Ömər bu qızın gözəl əxlaqına çox heyran qaldı. Bu vəziyyəti xanımına danışdı. Sonra da o qızı oğlu Asim ilə evləndirdi. Asimin bu qadından bir qızı oldu. Bu qızdan da adil xəlifələrdən Ömər bin Abdüləziz həzrətləri doğuldu.