SÖHBƏT - HƏR GÜNAHDAN ÇƏKİNMƏK LAZIMDIR

Günahların hamısı Allahın əmrlərini etməmək olduğu üçün böyükdür. Hədisi-şərifdə buyuruldu ki:

"Çox kiçik bir günahdan qaçmaq, bütün cin və insanların ibadətləri cəmindən daha yaxşıdır."

Allahu təalanın qəzəbi günahlar içində gizlidir. Allahu təala bir günah üzündən böyük əzaba düçar edə bilər. Yüz min il ibadət edən məqbul bir qulunu əbədi olaraq Cəhənnəmə qoya bilər. Məsələn, iki yüz min il itaət edən İblis kibr edib səcdə etmədiyi üçün sonsuz olaraq Cəhənnəmlik oldu. Adəm əleyhissəlamın oğlu bir adam öldürdüyü üçün əbədi Cəhənnəmlik oldu. Hər duası qəbul olan Bəlamı Baura bir günaha meyl etdiyi üçün imansız getdi. "Onun kimilər it kimidir", deyə dillərdə qaldı.

Qarun Musa əleyhissəlamın qohumu idi. O qədər zəngin idi ki, yalnız xəzinələrinin açarlarını 40 qatır daşıyardı. Bir neçə quruş zəkat vermədiyi üçün malı ilə birlikdə həlak oldu. Saləbə səhabə arasında çox ibadət edərdi. Məsciddən çıxmazdı. Bir dəfə sözündə dayanmadığı üçün səhabəlik şərəfinə qovuşa bilmədi, imansız öldü. Peyğəmbər əfəndimizə onun üçün dua etməməsi əmr olundu. Allahu təala bunlar kimi neçə kəslərdən bir günah səbəbi ilə belə intiqam almışdır.

O halda hər günahdan qaçmağa çalışmaq lazımdır. Kiçik bir günah işləyəndə tövbə və istiğfar etmək, yalvarmaq lazımdır. Günah işləyəndə ümidsizliyə düşməmək, dərhal tövbə etmək lazımdır. Möminin həm Allahın rəhmətindən ümidini kəsməməsi, həm də Ondan çox qorxması lazımdır. Hədisi-şərifdə buyuruldu ki:

"Möminin qəlbində qorxu və ümid varsa, Allahu təala onu ümid etdiyinə qovuşdurar, qorxduğundan da əmin edər."

Yəni, bir mömin Allahın əzabından qorxar, rəhmətindən də ümidini kəsməz, haramlardan qaçıb ibadətlərini etməyə çalışarsa Cənnətə gedər.