Allaha inanan və Ondan qorxan Onun əmr və qadağanlarına riayət edər. Heç kimə pislik etməz.

Özünə edilən yamanlığa səbr edər. Qüsurlarına tövbə edər. Çalışarkən, ticarət edərkən, kimsənin haqqını yeməz. Elm və əxlaq sahiblərinə hörmət göstərər. Yoldaşlarını sevər və özünü sevdirər. Heç kimi qeybət etməz, kimsəyə sərt davranmaz. Malı və vəzifəni hər kəsə yaxşılıq etmək üçün istəyər. Özünü bəyənməz. Allahu təalanın onu hər an gördüyünü və bildiyini düşünərək heç pislik etməz.

Qısaca Allahu təaladan qorxar və hər kəsə faydalı olar.
(Faydalı Bilgilər)

Bir abid ibadət etmək üçün dağa çıxar. Bir gecə yuxusunda ona "Filan çəkməçiyə get! Sənin üçün dua etsin" deyilir. Abid dağdan enər, o adamı tapar, nə işlə məşğul olduğunu soruşar. O da gündüzləri oruc tutub, ayaqqabı təmiri ilə məşğul olduğunu, qazandığı pul ilə ailəsinin ehtiyaclarını qarşıladıqdan sonra artıq qalan puldan ehtiyacı olanlara verdiyini söyləyər.

Abid onun gözəl bir işlə məşğul olduğunu, lakin özünün isə daha da yaxşı bir iş gördüyünü düşünər və təkrar olaraq ibadətinə qayıdar. Yenə gecə yuxusunda "Çəkməçiyə get və ondan "Bu üzündəki saralmanın səbəbi nədir?" deyə soruş. Abid də gedər çəkməçidən bunun səbəbini soruşar. Çəkməçi də "Kimi görsəm, bu qurtulacaq, amma mən həlak olacam, deyər və özümdən qorxaram. Üzümün də saralması bundandır" deyər. Bundan sonra o abid çəkməçinin bu qorxu və təvazö ilə üstünlük qazandığını başa düşər.