MƏNQİBƏ - ACLIQDAN ÖLƏN SƏRVƏT SAHİBİ (1)

Yusif əleyhissalam, böhtan üzündən zindanda ikən Misir hökmdarı bir yuxu görmüşdü. Qorxu ilə yuxusundan oyanıb; Mən yuxumda 7 kök inəyin 7 zəif inəyi yediyini və 7 yaşıl başaq, 7 də qurumuş başaq gördüm. Əgər yuxu yoza bilirsinizsə, bu yuxumu yozun, dedi. Onlar, Biz belə yuxuları yoza bilmərik, dedilər. Həzrəti Yusif ilə zindanda qalan şərbətçi, Həzrəti Yusifin yuxu yoza bildiyini xatırlayaraq; Mən bu yuxunu yozduraram, dedi. Həzrəti Yusifin yanına getdi. Misir hökmdarının yuxusunu danışıb yozmasını istədi.

Həzrəti Yusif, "7 il bolluq, sonra 7 il qıtlıq olacaq. Bolluqda saxlayın, qıtlıqda bunları yeyərsiniz. Bolluq illərində çox əkib, əkinləri saplaqları ilə birgə, başaqları ilə anbarlara qoymalısınız. Bu şəkildə əkinlər xarab olmadan qalar, həm də saplaqları heyvanlarınız üçün yem olar. Əhaliyə də əkinlərindən ehtiyacları qədər yemələrini, geriyə qalanını saxlamalarını əmr etməlisiniz. Bu yeməklər qıtlıq illərində sizin və digər insanların ehtiyaclarını qarşılayacaq" dedi.

Həzrəti Yusifin tövsiyələrini bəyənən hökmdar, Misirin xəzinələrinin idarə etməsini Həzrəti Yusifə həvalə etdi. Yəni onu maliyyə naziri etdi. O da lazımınca qənaət etdi. 7 bolluq ilindən sonra 7 qıtlıq ili gəldi. Hər tərəfdən taxıl almaq üçün insanlar gəlməyə başladı.

Bu hadisələrdən bir müddət sonra Yəmənə çox şiddətli bir sel gələrək ağacları kökündən çıxardı və binaların yıxılmasına səbəb oldu. Sular çəkildikdən sonra köhnə bir məzarın açıldığı görülür. Ortaya bir qadın cəsədiylə böyük bir sərvət çıxır. Kitabədəki yazı oxunduğu zaman bu cəsədin Himyeri hökmdarlarından birinin qızı olan Taca adındakı bir qadına aid olduğu aydın olur.