MƏNQİBƏ - ALLAHU ƏHAD VƏR-ƏLÇİSİ ƏHMƏD

İbrahim Havvas həzrətləri buyurur: "Bir il həccə getməyə niyyət etdim. Bu niyyətlə yola çıxdım. Məqsədim Kəbəyi-şərif tərəfə getmək olduğu halda, istəməyərək tərs istiqamətə gedirdim. Allahu təalanın iradəsi məni qərb tərəfinə çəkirdi. Ən sonunda İstanbula getməyə qərar verdim. Şəhərə girdim. Yüksək bir imarət gördüm. Qapı qarşısında bir qisim insanlar toplanmışdı. Yaxınlaşdım və "nə üçün toplandınız?" deyə soruşdum. "Rum hökmdarının qızı havalanıb. Əlacını tapmaq üçün həkimlər toplanıb" dedilər.

Bunda bir hikmət var, dedim və içəri girdim. Orada hökmdarın qızını parlaq ay kimi gördüm. Mənə baxıb dedi ki:
- Xoş gəldin, ey İbrahim Havvas!
- Məni haradan tanıyırsınız?
- Canımı Canana təslim etmək istədim və Haqq təaladan sevdiyi bir qulunu yanımda olmasını niyaz etdim. Yuxumda buyuruldu ki: "Sabah İbrahim Havvas sənə gələcək!"
- Xəstəliyiniz nədir?
- Bir gecə çölə çıxıb ibrət nəzəriylə səmaya baxdım. Özümdən keçdim. "Allahu əhad vər-əlçisi Əhməd" sözü dilimə, mənası ürəyimə gəldi. Bu sözü dilimdən salmaz oldum. Bu səbəbdən halıma dəlilik əlaməti, mənə də dəli dedilər. (Bu sözlərin mənası, "Allah birdir və Peyğəmbəri Əhməd (yəni Məhəmməd əleyhissalam"dır).
- Bizim diyara gəlmək istərsənmi?
- Sizin diyarda nə var?
- Məkkə, Mədinə və Beytül-muqaddəs (Məscidi-Əqsa) oradadır.
- Sağ tərəfinə bax!
Baxdım bir düzlükdə Məkkə, Mədinə və Beytül-muqaddəsi qarşımda gördüm. Az sonra dedi ki:
- Vaxt yaxınlaşdı. İstək və arzu həddi aşdı.
Kəlmeyi-şəhadət gətirib ruhunu təslim etdi.