MƏNQİBƏ - BATMAYAN GƏMİ

Əbu Müslimi Saftar övliyanın böyüklərindəndir. Bir gün gəmi ilə yola çıxdı. Yanında çox şəxslər də var idi. Qəfil əks istiqamətdən bir külək əsdi. Dalğalar yüksəldi, gəmi batacaq kimi oldu. Gəmidə olan yükü dənizə atdılar. Kömək istədilər.

Əbu Müslim deyir ki: "Bizimlə birlikdə gəmidə kim olduğu bilinməyən bir kəndli vardı. Yanında bir kitabı vardı. Oradan qalxdı və kitabı əlinin üstünə qoydu və belə yalvararaq dua etdi: "Ya Rəbbi! Əgər bir kimsənin əlində dünya Sultanından bir məktub olsa, heç kim ona hücum etməz, zərər verməz, bəlalardan əmin olar. Kitabı qaldırdı və "Ya Rəbbi! Bu sənin kitabındır, bunu bizə verdin. Əllərində sənin kitabın olan qullarını suda boğmaq kərəminə yaraşmaz. Bizi təhlükədən qurtar".

Dərhal dalğalar sakitləşdi və dəniz süd kimi oldu və sağ salamat getdik.