TARİX - EBOLA VİRUSU

1976-cı ildə Sudanın Nzara regionunda insanlar xəstələnərək bir birinin ardınca ölməyə başlamışdılar. Bu epidemiyaya Ebola çayının adı verilmişdir. Epidemiya əsasən mərkəzi və qərbi Afrikanın tropik meşələrə yaxın kənd ərazilərində yayılmağa başlayıb. Sonuncu yayılma dalğası isə bu ilin martından etibarən qərbi Afrika, xüsusilə Qvineya, Sierra Leone və Liberiyada başlanıb.

Ebola virusu "bəşər tarixinin ən qəddar virus xəstəliyi" adını alıb. Bu virusun 5 müxtəlif tipləri var və yoluxanların həyatda qalma şansı çox azdır. Ebola virusuna qarşı hələ ki, heç bir təsdiq edilmiş peyvənd növü mövcud deyil.

Ebola virusu insanlara virus daşıyıcısı olan heyvanlardan keçir. Yarasa, meymun və digər heyvan növləri virus daşıyıcısı ola bilər;
Ebola insandan insana qan və digər bədən daxili mayelərlə əlaqə yoluyla keçir.

Dəfn mərasimlərində ölü insana toxunmaq yoluyla da virusa yoluxmaq mümkündür;

İnfeksiyaya yoluxmanın ilk əlamətləri bədən hərarətinin qəfil yüksəlməsi, əzələ ağrıları, ümumi halsızlıq, başağrısı və boğaz iltihabıdır. Növbəti mərhələdə xəstədə qusma, ishal, bədəndə səpki, böyrək nasazlığı və qara ciyər fəaliyyətində problemlər müşahidə olunur.

Virusa yoluxmamaq üçün ferma və təsərrüfatları tez-tez təmizləmək və dezinfeksiya tədbirləri görmək mütləqdir. Heyvanlara yalnız əlcək və qoruyucu geyimlər geyindikdən sonra toxunmaq, ət məhsullarını yaxşıca qaynatdıqdan sonra yemək lazımdır.