MƏNQİBƏ - HƏR KƏSİN CƏZA VƏ MÜKAFATI VERİLİB

Bəhlul Danə bir gün Harun Rəşiddən bir vəzifə istədi. Harun Rəşid də ona bazar nəzarəti vəzifəsini verdi. Bəhlul Danə dərhal işə başladı. İlk olaraq bir çörək bişirilən sobaya getdi. Bir neçə çorəyi tərəzidə çəkib, hamısnın normadan az olduğunu gördü. Dönüb sobaçıya dedi:

"Həyatından razısanmı, dolana bilirsənmi, ailənin dolanığı varmı?"
Sobaçı hər suala mənfi cavab verdi və dolanışığından şikayət etdi.

Bəhlul bir şey demədən oradan ayrıldı və bir başqa sobaya yaxınlaşdı. Orada da bir neçə çorəyi tərəzidə ölçdü və gördü ki, çörəklər normadan artıq gəlir, heç əskiyi yoxdur. Eyni sualları bu soba sahibindən soruşdu. Bütün suallara müsbət cavab aldı və dolanışığından çox razı qaldığını eşitdi.

Bundan sonra bir başa Harun Rəşidin yanına getdi və yeni bir vəzifə istədi. Harun Rəşid: "Bəhlul, sənə vəzifəni daha yeni vermişdik. Nə tez bezdin?" dedi.

Bəhlul cavab verdi:
"O bazarın nəzarətçisi var imiş. Məndən əvvəl çörəkləri ölçmüş, vicdanları ölçmüş, buna görə hər kəsə hesabını ödəmiş, cəza və mükafatları verilmiş, mənə ehtiyac qalmadı".