SÖHBƏT ALLAHI HEÇ UNUTMAMAQ (2)

İslam alimləri, “Beş vaxt namazını doğru qılan, bütün nemətlərin şükrünü əda etmiş olur” buyurmuşdur. 24 saat davamlı Allahu təalanı anmaq, xatırlamaq, Ona şükr etmək lazımdır. Bu isə qəflətdə ikən mümkün olmaz. “Kim beş vaxt namazı qılarsa, bir vaxtdan sonra digər vaxtı düşünəcəyi üçün, yatarkən sübh namazını düşünəcəyi üçün, bütün gün Allahı xatırlamış və Ona şükr etmiş olur” buyrulur. Beş vaxt namazı qılanlar üçün çox belə müjdələr verilmişdir.

Allahu təalanı heç unutmamaq demək, yəni hər işi İslamiyyətə uyğun görməyə çalışmaq deməkdir.

Hər səhər, “Özümün ve ailəmin ruzisini qazanmaq, onları heç kimə möhtac qoymamaq, Allahu təalaya rahat və təmiz ibadət edə bilmək, axirət yolunda gedə bilmək üçün işimə gedirəm” deyə niyyət edən bir şəxs daima savab qazanır. Onun hər işi ibadət olur. (K. Səadət)

Məktəbə gedən bir tələbə, “Məktəbə təhsilim bitdikdən sonra müsəlmanlara, insanlara xidmət etmək üçün gedirəm. Ya Rəbbi, mənə faydalı elm nəsib eylə!” deyə niyyət edərsə, məktəbdə və evdə dərslə məşğul olarkən hər an savab alar, Allahı unutmuş sayılmaz.

“Bu günahdır”, deyərək çəkinməyə çalışanın və ya “bu savabdır” deyərək o işi etmək istəyənin Allahı unutmadığı məlum olur.