MƏNQİBƏ HƏR KƏSİN CƏZA VƏ MÜAKFATI VERİLİB

Bəhlul Danəndə, bir gün Harun Rəşiddən bir vəzifə istədi. Harun Rəşid də ona dükan-bazar ağalığını verdi. Bəhlul vaxt itirmədən işə başladı. Əvvəlcə bir çörək bişirilən yerə getdi. Bir neçə çörəyi tərəzidə çəkdi, hamısı normal qramından əksik gəldi. Dönüb çörəkçidən soruşdu: 

“Həyatından məmnunsanmı, dolana bilirsənmi, ailənlə, oğul-uşaqla ağzının dadı varmıdır?”

Adam hər suala mənfi cavablar verdi.

Bəhlul bir şey demədən oradan uzaqlaşdı və bir başqa çörəkçiyə getdi. Orada da bir neçə çörəyi tərəzidə çəkdi və gördü ki, bütün çörəklər qram normalarından artıq gəlir ki əksik gəlmir. Eyni sualları bu çörəkçiyə verdi  və hər suala müsbət cavab aldı. 
Bundan sonra başqa heç bir yerə baş çəkmədən birbaşa Harun Rəşidin hüzuruna çıxdı və yeni bir vəzifə istədi. Harun Rəşid "Bəhlul, daha dünən vəzifə verdik sənə, nə tez bezdin?" dedi. 
Bəhlul açıqladı:

“Dükan-bazarın ağası var imiş! Məndən öncə tərəzidə çörəkləri çəkib, vicdanları çəkib, ona uyğun da hər kəs hesabını ödəyib, cəza və mükafatları verilib və mənə ehtiyac qalmayıb.”