MƏNKİBƏ BÖYÜKLƏRƏ XİDMƏT

Bir Müsəlmanın axirətdə hesabı görülür, günahları çox, savabları az gəlir. Tam Cəhənnəmə atılacağı zaman bir kiçik torba savab xanasına gəlir və birdən savab tərəfi ağır gəlir. Həmin müsəlman təəccüb edir, “Bu nədir, mən hansı yaxşılığı işlədim ki, məni cənnətlik etdi?” deyə mələklərə soruşur. Torbanı açıb baxırlar ki, iki kürək torpaq. Mələklər də, “Bu nədir biz də bilmirik, Allahu təalaya soruşaq” deyirlər və ərz edirlər. Allahu təala buyurur ki:

“O, mənim övliya bir qulum dəfn edilərkən qəbrinə iki kürək torpaq atmışdı. Mənim sevimli qulumu sevən, ona yaxşılıq edən bir qulumu heç Cəhənnəmə ataram?”

HEKAYƏ                            İLK HR (KADRLAR ŞÖBƏSİ) DƏRSİ

Universitetin ikinci kursunda təhsil aldıqda professor bizimlə yazılı test keçirmək istədiyini bildirdi. Çalışqan tələbə olduğumdan bütün suallara tez bir şəkildə cavab verdim, yalnız birindən başqa: “Universitetin korpusunu təmizləyən xadimənin adı nədir?”.

Mənə elə gəldi ki, bu bir zarafatdır. Doğrudur, mən bizim xadiməni bir neçə dəfə görmüşdüm. Bu yaşı 50-dən çox olan, hündür, tünd saçlı bir qadın idi, lakin onun adını necə bilə bilərdim?! Bu suala cavab vermədən test vərəqimi təhvil verdim. Dərsin başa çatmasına yaxın tələbələrdən biri həmin sualın yekun qiymətləndirməyə təsir edib etməyəcəyini soruşdu.

—Təbii olaraq, — deyə professor cavab verdi. — Hansı işə düzəlməyinizdən asılı olmayaraq çox saylı insanla ünsiyyət qurmalı olacaqsınız və onların içərisində mütləq olaraq “mühüm olmayan” insanlar da olacaq. Onların hər biri sizin diqqət və qayğınıza layiqdir, hətta bu adi salamlama olsa belə.

Mən həyatım boyunca bu dərsi özüm üçün nümunə olaraq götürdüm. Üstəlik, xadimənin də adını öyrəndim. Onun adı Doroti idi.