Сұхбат... Үмбетім мына 15 нәрсені істесе...

Хазреті Әбу Хурайра мен хазреті Әли (радиаллаһу анһум әжмаин) жеткізген хадисте пайғамбарымыз алейһиссалам ақырзаман таяғанда болатын келеңсіз істерден хабар берген.

Үмбетім мына 15 нәрсені істегенде бастарына бәле келеді:

1. Олжа (немесе мемлекеттік кірістер) монополияға айналдырылса;

2. Аманаттар олжа көрілсе (қолындағы аманат заттарды олжа көріп, өзіне иемденіп кету ісі кең етек алса);

3. Зекет – айыппұл сияқты көре бастаса (адамдар зекетті ықыласпен емес, айыппұл төлегендей берсе);

4. Ілім – діннен өзге үшін оқылса (діни білімді Аллаһтың дінін жаю үшін емес, дүние табу үшін үйренсе);

5. Күйеуі әйелінің айтқанынан шықпай, анасына қарсы келсе (әйелін ғана разы етумен болса және ата-анасына қарсы келсе);

6. Досына жақын болып әкесінен ұзақтаса;

7. Мешіттерде қатты дауыстар шыға бастаса;

8. Тайпаны залым, пасық адамдар басқарса, (ел басын, әкімдік т.б ел тізгінін залым, парасатсыз адамдар ұстаса);

9. Қауымның басына ең тексіздері келсе;

10. Кісі жамандығынан қорқылып сыйланса (халық қорыққанын сыйлайтын болса);

11. Әнші әйелдер мен музыкалық аспаптар белең алса;

12. Арақ-шарап ішілсе;

13. Үмбеттің кейінгілері алдыңғыларын сөге бастаса;

14. Жібек киілсе (еркектер жібек киюді әдет қылса);

15. Аталмыш тірліктер орын алған кезде – қызыл дауылды, зілзәлә – жер сілкінісін, жердің ойылуын, бейнелердің өзгеруін (мысалы, адамдардың бейнелерінің өзгеруі), тас борандарды және тағы сол сияқты жібі үзіліп бірінен соң бірі түскен моншақтар тәрізді қияметтің белгілерінің келуін күтіңдер!