TARİX OSMANLI DÖVLƏTİ

Osmanlı Dövləti haqqında tarixçi mütəxəssislər qurucuları və idealları haqqında bu məlumatları verir:

Osmanlı Dövləti, dünyanın ən böyük, ən uzun ömürlü, böyük mədəniyyət və incəsənət qurucusu, böyük təşkilat və müəssisələrə sahib Türk-İslam dövlətidir. Türk və İslam tarixinin ən möhtəşəm dövrü Osmanlıların zamanıdır. Onlar, milli və İslami məfkurələrinin dahiyanə tərkibi, siyasi sabitlik və ictimai ədalət sayəsində, üç qitənin ortasında və Aralıq dənizi hövzəsində, insanlıq tarixində nizamı-aləm iddiasının ən qüdrətli nümayəndələri olmuşlar. İndoneziyadan İspaniyaya, Krımdan Yəmənə və Almaniyadan Afrikanın mərkəzinə qədər müsəlman millətlərin himayədarlığını etdilər. Osmanlılar, insani əsaslara bağlı bir dünya dövləti qurmuşlar, elmə, sənətə, mədəniyyətə və insanlığa əsrlərlə faydalı xidmətlər etmişlər. (Quruluş 27 Yanvar 1299)

Osmanlı xanədanı, dünyada heç bir ailəyə nəsib olmayan, böyük və dahi padşahları, bir-birinin ardınca yetişdirməklə bu dövlətə yalnız ən böyük şərəfi bəxş etməklə yanaşı, həmçinin onu milli, İslami və insani ideallar üzərində millətin qəlbini qazanaraq, cahan hakimiyyəti düşüncəsini də, ən möhkəm bir təşkilat halına gətirdi. Osmanlı Dövləti, qövmlər, dinlər və məzhəblər arasında sağlam bir ahəng qurmaqla, xalq kütlələri arasında heç bir fərq və təzada imkan verməməklə, dünya tarixində ən qüdrətli və ümumi bir siyasi varlıq təşkil etdirdi. Bu böyük siyasi varlıq, köhnə və yeni dövlətlərdən fərqli olaraq, nə xaricdə zəbt təhdidlərinə və nə də içəridə müxtəlif irq, din, məzhəb mənsubları və qrupların narahatlıqlarına səbəb buraxmırdı.

Son illərdə bu cahan dövlətinə qarşı türklərin və müsəlmanların tarixdə bu ən böyük və ən uzun ömürlü dövlətinə ağır ittihamlar edilməkdədir. Halbuki tarix arxivə dayanır. Tarix araşdırılarkən o zamanda yaşayan digər dövlətlərlə qarşılaşdırmaq lazımdır. Belə edilsə tarixi həqiqətlər daha yaxşı aydın olar.